Հեմոֆիլիայի և թրոմբոզների կենտրոն

ՀՀ ԱՆ «Յոլյան» արյունաբանության և ուռուցքաբանության կենտրոնում 2021 թվականից գործում է տարածաշրջանում եզակի Հեմոֆիլիայի և թրոմբոզի կենտրոնը, որը մասնագիտացված է մակարդելիության համակարգի խանգարումների ճշգրիտ ախտորոշման, բուժման և երկարաժամկետ վերահսկման մեջ։

Կենտրոնը միավորում է կլինիկական պրակտիկան, միջազգային համագործակցությունը և գիտահետազոտական ներուժը՝ արյունահոսական հիվանդություններով և թրոմբոզով պացիենտների բուժման և վերահսկման գործընթացում։

Այն հանդիսանում է ՀՀ-ում միակ հաստատությունը, որն ամբողջությամբ նվիրված է ինչպես բնածին, այնպես էլ ձեռքբերովի արյունահոսական և թրոմբոտիկ հիվանդություններով պացիենտների համապարփակ բուժմանը։ Բարձր որակավորում ունեցող բազմամասնագիտական (մուլտիդիսցիպլինար) թիմն առաջնորդվում է միջազգային ուղեցույցներով և բուժման արդիական մոտեցումներով՝ ապահովելով միջազգային չափանիշներին համապատասխան բուժօգնություն։

Հեմոֆիլիայի և թրոմբոզի կենտրոնում են ախտորոշվում, բուժում ստանում և հսկվում ժառանգական և ձեռքբերովի արյունահոսական հիվանդություններով (կոագուլոպաթիաներ, թրոմբոցիտոպաթիաներ, թրոմբոցիտոպենիաներ) պացիենտները, ատիպիկ տեղակայման, կրկնվող թրոմբոզներով, նորածնային թրոմբոզով հիվանդների hետագա բուժումը , հսկողությունը նույնպես իրականացվում է այս կենտրոնում կատարվում են մի շարք կլինիկական հետազոտություններ։

Կենտրոնում իրականացվում է․

ժառանգական և ձեռքբերովի արյունահոսական հիվանդությունների (կոագուլոպաթիաներ, թրոմբոցիտոպենիաներ, թրոմբոցիտապաթիաներ) ախտորոշում, բուժում և հետագա հսկողություն,
ժառանգական հեմոֆիլիայով պացիենտների ֆիզիոթերապիա,
թրոմբոտիկ հիվանդությունների վարում (ատիպիկ տեղակայման, կրկնվող թրոմբոզներով, նորածնային թրոմբոզով հիվանդների hետագա բուժում և հսկողություն)
կլինիկական հետազոտություններ,
պացիենտների կրթական սեմինարներ կազմակերպում և հոգեբանական, սոցիալական աջակցություն։

Կենտրոնի կողմից ստեղծվել է նաև հեմոֆիլիայով և թրոմբոֆիլիայով հիվանդների ազգային ռեգիստր, որտեղ գրանցված հեմոֆիլիա ախտորոշմամբ պացիենտների բուժումն իրականացվում է երկու հիմնական մոտեցմամբ՝

կանխարգելիչ՝ դեղորայքի պարբերական ներարկումներ, որոնք սկսվում են վաղ տարիքից՝ սպասվող արյունահոսությունները կանխելու նպատակով,
ըստ պահանջի՝ դեղորայքի կիրառում արյունահոսության դեպքում:

Ժառանգական հեմոֆիլիա ունեցող պացիենտների բուժօգնությունը տրամադրվում է պետպատվերի շրջանակներում։ 2016 թվականից ի վեր Հեմոֆիլիայի և թրոմբոզի կենտրոնում իրականացվել է հինգից ավելի միջազգային կլինիկական հետազոտություն, որոնք ուղղված են ժառանգական մակարդման խանգարումների ժամանակակից թերապիաների ներդրմանը։

Կենտրոնի մասնագետները վերապատրաստվել են աշխարհում առաջատար կենտրոններում՝ Վիեննայում, Օքսֆորդում, ԱՄՆ-ում, Իտալիայում, Ռուսաստանում, Իսրայելում։ Նրանք ակտիվորեն համագործակցում են միջազգային կառույցների հետ՝ ՀՀՖ (Հեմոֆիլիայի համաշխարհայի ֆեդերացիա), ISTH (Հեմոստազի և թրոմբոզի միջազգային միություն), EDQM-ի և այլն։

Կենտրոնը հանդիսանում է նաև Հայաստանի Հեմոֆիլիա ունեցող պացիենտների միության գրասենյակը։ Միությունը իրականացնում է շահերի պաշտպանություն, հիվանդների կրթություն և համայնքային աջակցություն՝ նպաստելով հեմատոլոգիական հիվանդությունների շուրջ ինֆորմացվածության բարձրացմանը: