Ձեռքբերովի կոագուլոպաթիաներ

Վիտամին K-ի անբավարարությամբ պայմանավորված կոագուլոպաթիա (ICD-10: D68.4)

Վիտամին K-ն անհրաժեշտ է, որպեսզի լյարդը արտադրի արյան մակարդման հիմնական գործոնները (II, VII, IX, X)։ Երբ այն պակասում է, այս գործոնները չեն ձևավորվում, և արյունը բավարար չի մակարդվում։ Հետևանքն են տարբեր արյունահոսությունները՝ մաշկի կապտուկներ, քթային և լնդային, ստամոքս–աղիքային արյունահոսություններ, իսկ ծանր դեպքերում՝ ներգանգային արյունազեղում։

Պատճառները կարող են լինել․

• վիտամին K-ով աղքատ սնունդ,
  
• նորածինների մոտ՝ լյարդի անբավարար պաշար և միկրոֆլորայի բացակայություն,
  
• լյարդի հիվանդություններ և ճարպի ներծծման խանգարումներ (խոլեստազ, ցելիակիա, աղիքային բորբոքային հիվանդություններ),
  
• որոշ դեղեր՝ վարֆարին (վիտամին K-ի անտագոնիստ), լայն սպեկտորի հակաբիոտիկներ։
  

Ախտորոշում․ հիմնականում երկարացած պրոթրոմբինային ժամանակ (PT), մինչդեռ թրոմբոցիտների քանակը նորմալ է։

Բուժում․

• Վիտամին K-ի ներարկումներ (թեթև դեպքերում՝ նաև բերանացի ընդունում)
  
• Թարմ սառեցված պլազմա կամ պրոթրոմբինային կոմպլեքսի կոնցենտրատ՝ ծանր կամ կյանքին սպառնացող արյունահոսության դեպքում
  
• Նորածիններին կանխարգելիչ նպատակով տրվում է վիտամին -K-ի ներարկում՝ հեմոռագիկ հիվանդությունից պաշտպանելու համար
  
• Վարֆարինի չափից ավելի օգտագործման դեպքում բուժումը ուղղված է նրա ազդեցությունը չեզոքացնելուն․ հիմնական միջոցը վիտամին K-ն է, իսկ ծանր դեպքերում՝ ՊԿԿ կամ թարմ սառեցված պլազմա։
  

Կարևոր է ոչ միայն լրացնել վիտամինի պակասը, այլև բուժել այն հիմնական պատճառը, որը հանգեցրել է այդ վիճակին, որպեսզի կանխվի կրկնությունը։