«Յոլյան» կենտրոնի իմունաարյունաբանության բաժանմունքը համալրվել է նոր սարքով

Ավելի անվտանգ դոնորական արյուն, արյան հետազոտությունների գերճշգրիտ եւ գերարագ արդյունքներ, ամբողջովին ավտոմատացված համակարգ. «Յոլյան» կենտրոնի իմունաարյունաբանության բաժանմունքը համալրվել է նոր սարքով:

Նոր՝ ORTHO VISION Swift իմունաարյունաբանական ախտորոշման ավտոմատացված սարքը կարող է ժամում մշակել տասնյակ նմուշներ և վերլուծել արդյունքները, ինչպես նաև փորձարկման արդյունքները պահել ներկառուցված հիշողության մեջ։ Սարքի առավելությունից է նաև նմուշների ավելացման հնարավորությունը` ցանկացած ժամանակ՝ առանց դադարեցնելու արդեն իսկ գործող հետազոտական աշխատանքը:

Համակարգը թույլ է տալիս միաժամանակ իրականացնել իմունաարյունաբանական հետազոտությունների այնպիսի շրջանակ, ինչպիսին են`

• Արյան ABO, Rh-Hr եւ Kell պատկանելիության որոշում,
• Էրիթրոցիտար համակարգի անտիգենների որոշում ընդլայնված սանդղակով (Kk, MNSs, P, Duffi, Kidd, Lewis, Lutheran),
• Հակաէրիթրոցիտար հակամարմինների որոշում (ըստ միջազգային ստանդարտների),
• Ռեզուս համակարգի հակամարմինների որոշում Կումբսի անուղղակի ռեակցիայով,
• Cross-matching ռեակցիա արյան բաղադրամասերի և ոսկրածուծի ընտրության համար,
• Արյան էրիթրոցիտար խիմերիզմի որոշում փոխներարկումների և փոխպատվաստման ժամանակ,
• ABO համակարգի իմուն հակամարմինների (հեմոլիզինների) որոշում,
• Արյան բաղադրամասերի ընտրություն (էրիթրոցիտար զանգված, թարմ սառեցված պլազմա, թրոմբոցիտներ),
• Կումբսի ուղղակի և անուղղակի ռեակցիաների որոշում:
  

Նոր ավտոմատացված սարքը հնարավորություն է տալիս հետազոտություններն իրականացնել ավելի բարձր որակով ու ճշգրտությամբ: