Հայաստանում մանկական քաղցկեղի առաջնակի դեպքերի թիվը չի աճել

Վերջին տարիներին մեր երկրում տարեկան արձանագրվում է մոտ 100-120 առաջնակի դեպք և այդ ընթացքում մանկական քաղցկեղի առաջնակի դեպքերի թիվը չի աճել։  Հատկանշական է, որ մեր երկրում առողջացման ցուցանիշը մոտենում է զարգացած երկրների ցուցանիշներին՝ մինչև 85 % դեպքերում երեխաները լիարժեք ապաքինվում են։

«Յոլյան» արյունաբանության և ուռուցքաբանության կենտրոնը հանդիսանում է Հայաստանում միակ կառույցը, որը զբաղվում է երեխաների արյան և ուռուցքաբանական հիվանդությունների ախտորոշմամբ և համալիր բուժմամբ։

2019 թվականից ի վեր մանկական ուռուցքաբանական և արյունաբանական ծառայությունների միավորումը ձևավորեց ժամանակակից, բազմամասնագիտական համակարգ, որը համապատասխանում է միջազգային չափանիշներին։

Դրա արդյունքում Հայաստանում մանկական քաղցկեղի վիճակագրությունը դրական փոփոխությունների ենթարկվեց․մանկական քաղցկեղի առաջնակի դեպքերի ախտորոշումն ավելի արդյունավետ կազմակերպվեց, որի արդյունքում դեպքերի մեծ մասը բացահայտվում և բուժվում է ժամանակին։

Մանկական քաղցկեղի միջազգային օրը խոսում ենք ոչ միայն մարտահրավերների, այլ նաև հնարավորությունների մասին։ Այսօր Հայաստանում մանկական քաղցկեղի բուժման ժամանակակակից բոլոր հնարավորությունները հասանելի են։

Այսօր մեր կենտրոնում իրականացվում է՝

• Մանկական ուռուցքային հիվանդությունների ամբողջական ախտորոշում և բուժում,
• Միջազգային (եվրոպական և ամերիկյան) բուժման սխեմաների կիրառում,
• Ոսկրածուծի փոխպատվաստում (աուտո և ալոգեն),
• Հոգեսոցիալական աջակցություն երեխային և ընտանիքին՝ բուժման ողջ ընթացքում,
• Քաղցկեղը վերապրածների երկարաժամկետ հսկողության կլինիկա,
• Քաղցկեղի նախատրամադրվածության կլինիկա,
• Մանկական պալիատիվ խնամք (նաև՝ շարժական)։

Մենք համագործակցում ենք աշխարհի առաջատար կենտրոնների հետ և հանդիսանում ենք St. Jude Children’s Research Hospital-ի գլոբալ ալյանսի անդամ։

Ի շնորհիվ կենտրոնի նվաճումների քաղցկեղով հիվանդ երեխաները կարող են ստանալ ամբողջական բուժում Հայաստանում՝ առանց արտերկիր մեկնելու անհրաժեշտության։ Բուժման համար, պետության և City of smile հիմնադրամի աջակցության շնորհիվ, ընտանիքները ազատված են ֆինանսական բեռից։ 

Մենք պայքարում ենք ամեն օր՝ յուրաքանչյուր երեխայի կյանքի որակի բարելավման և ապաքինման համար։