«Ախտորոշում. խնամքի առաջին քայլը»․ այսօր Հեմոֆիլիայի համաշխարհային օրն է

Հեմոֆիլիան ժառանգական արյունահոսական խանգարում է, որի հիմքում ընկած է մակարդման գործոնների պակասը կամ ֆունկցիոնալ անբավարարությունը։ Հաճախ այն հանդիպում է տղաների մոտ, քանի որ կապված է X քրոմոսոմի հետ, կանայք հանդիսանում են գենի փոխանցող։

«Յոլյան» արյունաբանության և ուռուցքաբանության կենտրոնը Հայաստանում միակ կառույցն է, որը զբաղվում է հեմոֆիլիայի բուժմամբ՝ միջազգային բոլոր չափանիշներին համապատասխան։ Բարձր պատրաստվածություն ունեցող մասնագետների շնորհիվ կենտրոնում գործում է բազմապրոֆիլ խնամքի մոդել, որն ապահովում է կանխարգելում, բուժում, ֆիզիոթերապիա, ռեաբիլիտացիոն թերապիա, ատամնաբուժական և հոգեբանական աջակցություն։

Հայաստանի ազգային տվյալների համաձայն կա գրանցված 299 պացիենտ, որոնք, ի տարբերություն տարիներ առաջ ունեցած խնդրի, այժմ դեղորայքի հասանելիության առումով որևէ խնդիր չունեն։ Պացիենտները ՀՀ Առողջապահության նախարարության կողմից ստանում են ամբողջական աջակցություն՝ խնամքն ու թանկարժեք հակահեմոֆիլային միջոցները, որոնք պացիենտները պետք է ընդունեն ողջ կյանքի ընթացքում։ Աջակցություն է տրամադրվում նաև Հեմոֆիլիայի համաշխարհային կազմակերպության կողմից․ մշտապես իրականացվում է դեղորայքային ապահովում, մասնագետների վերապատրաստում և մենթորություն։

Հեմոֆիլիայի համաշխարհային օրվա այս տարվա կարգախոսն է «Ախտորոշում. խնամքի առաջին քայլը»։ Կարևորելով վաղ ախտորոշման դերը՝ մեր նպատակներից մեկն է նոր դեպքերի վաղ հայտնաբերումն ու արագ ներառումը կանխարգելիչ բուժման ծրագրերում։

Այս հիվանդության վաղ ախտորոշման շնորհիվ հեմոֆիլիայով երեխաներն ու մեծահասակները հիվանդությանը զուգահեռ հնարավորություն են ստանում իրենց բնականոն կյանքը վարելու։ Առանց սահմանափակումների նրանք կարող են հաճախել դպրոց, համալսարան, սպորտային կյանքով ապրել և գրանցել հաջողություններ։

Յուրաքանչյուր պացիենտ արժանի է անհատականացված, շարունակական և լիարժեք բուժում ստանալուն։